Һуңғы ҡыңғырау көнөндә бейеү флешмобы уҙғарыла

Баш ҡалала байрам 25 майҙа «Торатау» конгресс-холы майҙансығында ойошторола. Өфө хакимиәте башлығы урынбаҫары Гөлләриә Ялсыҡаева хәбәр итеүенсә, сығарылыш уҡыусылары вальс башҡарып, бейеү флешмобында ҡатнаша, уҡытыусылар күмәкләп хор менән йырлай, ә ата-әсәләр үҙенсәлекле ҡотлау менән сығыш яһай.

«Мәктәп тамамлау – онотолмаҫ байрам. Сығарылыш уҡыусылары был көндө ғүмерлеккә хәтерендә ҡалдырырлыҡ итеп ойошторорға теләйбеҙ. Күләмле, яуаплы сара. Беҙҙең төп бурысыбыҙ – байрамда ҡатнашыусыларҙың һәм ҡунаҡтарҙың хәүефһеҙлеген тәьмин итеү», – тине Өфө вице-мэры.

Алдараҡ «Башинформ» агентлығы республикала Һуңғы ҡыңғырау байрамы көнөндә алкоголь продукцияһын һатыуҙы тыйыуҙарын хәбәр иткәйне.