Башҡорт ѳйѳ асылды

Башҡорт ѳйѳн асыу тантанаһында Тимер юл ауыл хакимиәте башлығы Артур Закиров, район-ҡала ағинәйҙәре етәксеһе Зѳбәржәт Суфьянова, "Урал" гәзитенең баш мѳхәррире Сатура Минһажетдинова, ауыл клубы мѳдире Александр Житнюк, художество етәксеһе Екатерина Ганаева, етәкселәре Фәрзәнә Хәйбуллина менән Үткәл ағинәйҙәре ҡатнашты. Тимер юл ауылы ағинәйҙәре хѳрмәтләп саҡырған ҡунаҡтарын буҙа, сәксәктән ауыҙ иттереп, йыр-моң менән ҡаршы алды. 
Башҡорт ѳйѳ фойеһында ағинәйҙәрҙең эштәренән бай күргәҙмә ҡуйылған. Ниндәй генә эштәр юҡ бында, башҡорт ҡатын-ҡыҙҙарының традицион һәм стилләштерелгән милли биҙәүестәре - һаҡал- түшелдеректәр, мәрйендән үрелгән муйынсаҡтар, башҡорт кейемендәге ҡурсаҡтар, сигелгән таҫтамалдар, мендәр тыштары, ырғаҡ менән бәйләнгән биҙәкле тѳҫлѳ шәлдәр, матур тәпешкәләр, биҙәкле йѳн ойоҡтар күҙҙе шатландырып, күңелдәргә ҡыуаныс ѳҫтәй. Ҡунаҡтар бисмилла итеп, боронғолоҡто бар ысынбарлығында күрһәткән башҡорт ѳйѳнә үтәләр. Башҡорт халҡының кѳнкүрешен, тарихын, шѳғѳлѳн, кейгән кейемдәрен, рухи байлығын сағылдырған милли кейем ѳлгѳләре, боронғо һауыт-һаба, бик борондан ѳләсәйҙәрҙең ҡулы менән һуғылған, һаман тәбиғи тѳҫтәрен юғалтмаған балаҫтар, кейеҙ-юрғандар, бишектә тыныс ҡына иҙрәп йоҡлаған бәпес, күпереп торған мендәрҙәр урынлашҡан урындыҡ янында боронғо еп иләгес, һикелә еҙ батмуста ултырған самауыр, иҙәнгә йәйелгән әрмәк, бүлмә мѳйѳшѳндәге матур  мейескә быймалар теҙелгән, барыһы ла бүлмәгә матурлыҡ, нур ѳҫтәй.

Эйе, Тимер юл ауылында күп милләтле халыҡ йәшәй. Ҡатнаш халыҡ йәшәгән ерҙә һәр милләттең мәҙәниәтен, ғѳрѳф-ғәҙәттәрен, традицияларын иҫәпкә алып, тѳрлѳ саралар, байрамдар үткәреү халыҡты берләштерә, уларҙы матур эштәргә ойоштороуҙа нигеҙ булып тора. Ошо турала хакимиәт башлығы  Артур Ҡауый улы ла бик матур һүҙҙәр әйтте.