Ярҙам итеүҙе изге бурыс һанайҙар

Бына әле лә махсус хәрби операцияла ҡатнашҡан һалдаттарға ярҙам итеү маҡсатында Сосновка ауылы ағинәйҙәре йәнә бер һөнәр үҙләштерҙе - паракордтан браслет үрергә өйрәнде. Оҫталыҡ дәресен ай һайын үҙ аҡсаһына ошондай ҡулбауҙар эшләп, яугирҙарға ебәргән оло йөрәкле райондашыбыҙ Григорий Дорин, Әзекәй ауылы “Ағинәй” ойошмаһы етәксеһе Клара Мостафина, Әзекәй ауылы ҡатын-ҡыҙҙар советы етәксеһе Дилә Абдуллина уҙғарҙы.

Ҡул эштәренә маһир инәйҙәр был тәү ҡарамаҡҡа ҡатмарлы тойолған эште аң-тоңона йәһәт төшөндө. Клара Ишмырҙа ҡыҙы иһә ябай ғына итеп карабинлы ҡулбауҙарҙың эшләнешен, ҡулланылышын аңлатып бирҙе. Таҫыллыҡты арттырыу өсөн ҡайһы бер ағинәйҙәр өйгә алып ҡайтып эшләргә лә теләк белдерҙе.

- Бынан ары аҙнаның һәр шаршамбыһында мәҙәниәт усағына йыйылып, паракордтан браслет үрергә тип ҡарар ҡылдыҡ. Үҙ сиратымда, беҙҙең менән оҫталыҡ серҙәре менән бүлешкән Әзекәй ауылы уңғандары - Клара Мостафинаға, Дилә Абдуллинаға сикһеҙ рәхмәтемде белдерәм! – ти Сосновка ауылы “Ағинәй” ойошмаһы етәксеһе Земфира КӘРИМОВА.