«ГеоСаҡырыу» командалары тәүге һынауҙарҙы үтеп тә өлгөрҙө

Чемпионат программаһында кисә радиометрия, палеонтология, минералогия һәм петрография буйынса камера һәм ялан ярыштары булды. Улар Шишмә районының «Патриот» паркында ойошторолдо.
Радиометрия буйынса ярыштарҙа ҡатнашыусылар радиометрик күҙәтеүҙәр үткәреү күнекмәләрен күрһәтте. Уларға, үткәрелгән үлсәүҙәргә нигеҙләнеп, ялан картаһын төҙөү бурысы йөкмәтелә. Был карта полигон территорияһы буйлап радиоактивлыҡтың таралыуын, радиация кимәле юғары йәки түбән булған зоналарҙы күрһәтеп, сағылдырырға тейеш. Радиометрия геологтарға айырым тау тоҡомдарының барлығын аңларға ярҙам итә, уларҙың һәр береһе үҙ радиация фонына эйә.

Палеонтология буйынса ярыштар барышында ҡатнашыусылар ҡаҙылма өлгөләренән ерҙә ҡасан йәшәгән организмдарҙы, уларҙың ниндәй мөхиттә йәшәүен асыҡларға, уларҙың морфологияһын һүрәтләргә тейеш.

Минералография һәм петрография буйынса ярыштарҙа ҡатнашыусылар минералдарҙы, тау тоҡомдарын билдәләү һәм уларҙың тасуирламаһын контроль өлгөләр буйынса төҙөү оҫталығын күрһәтә.

“Ярышта ҡатнашыусылар үтә торған һынауҙар етди, улар белем һәм һөнәри күнекмәләрҙе генә талап итмәй, ярыштарҙа команда эше мөһим, һәм мин һәр кемдең был ярышта ла үҙен иң яҡшы яҡтан күрһәтеүен өмөт итәм. Барығыҙға ла уңыштар теләйем!” - тип комментарий бирҙе Башҡортостандың тәбиғәттән файҙаланыу һәм экология министры Нияз Фазылов. Алдан хәбәр итеүенсә, чемпионат программаһында - 11 төп этап ҡаралған.

 Шуныһы мөһим, ярыштарҙан тыш, чемпионат барышында ҡатнашыусыларҙың потенциаль эш биреүселәр менән үҙ-ара бәйләнеше лә бар. Беренсе "ГеоСаҡырыу"ҙа ҡатнашыусыларҙың күбеһе үҙҙәренең профессиональ траекторияһын уңышлы формалаштыра алған.