Уларҙы һаҡлаусы фәрештәгә тиңләйҙәр

 Тантаналы сара Әхмәтзәки Вәлиди исемендәге Милли китапханала уҙҙы. Награданы Мәскәү ҡунаҡтары - Рунет Яҙыусылар союзы вәкилдәре тапшырҙы.

- “Һаҡлаусы фәрештә” билдәһе - Ватанға ирекле һәм рыяһыҙ хеҙмәт итеү символы ул. Яугирҙар өсөн ысын мәғәнәһендә һаҡлаусы фәрештәгә әйләнгән ирекмәндәр - әсәйҙәр, кәләштәр, һеңлеләр, ауыл ҡарттары, мәктәп уҡыусылары, ябай хеҙмәт кешеләре - һәммәһе лә хәлдәренән килгәнсә МХО-ға ярҙам итә. “Юғарынан” күрһәтмә лә, мәжбүр итеү ҙә юҡ, тик йөрәк саҡырыуы буйынса... Уларҙың ярҙамы кемделер яраланыуҙан, үлемдән ҡотҡара, хәстәрлеккә сорнай, - тине үҙ сығышында Рунет Яҙыусылар союзы рәйесе Сергей Александров. 

Билдәле булыуынса, бөгөнгө көндә был наградаға ике тиҫтәнән ашыу ирекмән лайыҡ булған. Быға тиклем бындай тәбрикләү саралары Донецк Халыҡ Республикаһында, Мәскәүҙә үтһә, Өфөләге тантана иһә баш ҡалабыҙҙың 450 йыллығына арналды. Иҫтәлекле билдә менән төбәктең бер нисә районы һәм ҡалаһы вәкилдәре баһаланды. Уларҙың барыһы ла махсус хәрби операция зонаһындағы яугирҙарға, Донбасс халҡына әүҙем ярҙам итә.

Һәр йәһәттән булдыҡлы, даланлы, оло йөрәкле яҡташыбыҙ Резеда Сайдарова ла махсус хәрби операция башланғандан алып һалдаттарға ҙур ярҙам күрһәтә. Ике йыл эсендә уның башланғысы менән ике тиҫтәгә яҡын гуманитар йөк тупланған, өс миллион һум самаһы аҡса йыйылған! “Гүзәл” ательеһының үҙенсәлекле бренды - француз яулығын һатыуҙан алынған килемдең 20 проценты шулай уҡ яугирҙарға ярҙамға йүнәлтелә. Бынан тыш, ательела һалдаттар өсөн бушлай “позывной”ҙар сигелә.

Шәхси эшҡыуар Данис Йыһаншин тарафынан Белоретта дрон етештереү мәсьәләһе күтәрелгәс, Резеда Рифғәт ҡыҙы был изге башланғысты ла дәррәү хуплап сыҡты. “Эйе, техника менән йыһазландырыу йәһәтенән көстәр тигеҙ түгел - Украина йөҙөндә бөтә НАТО илдәре Рәсәйгә ҡаршы ҡупҡан. Егеттәребеҙҙең бер-бер артлы яу ҡырында баш һалыуы йөрәкте өтә. Һәм был хәлгә битараф ҡалыу мөмкин түгел. Үҙебеҙҙә дрон етештереү өсөн ай һайын миллион һум йыйырға кәрәк. Сумма ҙур, әммә берләшһәк, берҙәм булһаҡ, барыһы ла килеп сығасаҡ, Еңеү беҙҙең яҡта буласаҡ!” - ти илһөйәр ханым социаль селтәрҙәге сәхифәһендә халыҡҡа мөрәжәғәт ҡылып.

Әйткәндәй, аҡсалата ярҙамды “Сбербанк” картаһына бәйле 89033511817 (Резеда Рифгатовна С.) телефон һандары аша күсерергә мөмкин.

Үҙ сиратыбыҙҙа, Резеда Рифғәт ҡыҙын мәртәбәле наградаға лайыҡ булыуы айҡанлы ихлас ҡотлайбыҙ! Еңел булмаған эшмәкәрлегегеҙҙә тик уңыштар, теләктәштәр генә юлдаш булһын.