Бильярдта еңеү яуларға теләһәң - башыңды эшләт!

Һәр кемдең үҙ ғүмерендә бер тапҡыр булһа ла, ҡулына кий тотоп, бильярд уйнап ҡарағыһы киләлер. Ул бик боронғо уйын. Ә бит күптәр ошо мауыҡтырғыс спорт тѳрѳн ярата, буш ваҡытын ҡыҙыҡлы һәм файҙалы итеп үткәрергә тырыша. Бильярд менән мауығыусылар был спорт тѳрѳн һаулыҡ ѳсѳн дә бик файҙалы, тиҙәр. Бильярд иғтибарлы булырға, мейене эшләтергә, фекерләргә мәжбүр итә.  Шулай уҡ теүәкәллекте, етеҙлекте ярата. Ошо кѳндәрҙә ҡалала Ноэль Таһировтың бильярд клубында ошо уйынды үҙ иткән ир-егеттәр араһында  икенсе тапҡыр бильярд буйынса турнир үтте. 
Был бильярд клубы ҡалала ѳсѳнсѳ йыл эшләй. Уның бәләкәй генә тарихы ла бар. Ҡалала бильярд клубы ябылғас, ошо спорт тѳрѳн яратҡан бильярд һуғыусылар Ноэль Таһировҡа клуб асыуҙы һорап мѳрәжәғәт итә. Ул ир-егеттәрҙең үтенесен кире ҡаҡмай, тиҙ арала бильярд клубы асып ебәрә. Әлбиттә, кәрәкле ҡорамалдар алырға егеттәр ҙә матди ярҙам күрһәтә. Шулай итеп, хыялдары тормошҡа ашҡан ир-егеттәр  тағы ла дәртләнеп бильярд уйнай башлай. Ноэль Таһировтың бильярд клубы ял кѳндәрендә ир-егеттәрҙең аралашыу, буш ваҡыттарын файҙалы үткәреү урынына әйләнә. 
Бильярд буйынса  икенсе тапҡыр үткәрелгән турнирҙа ҡатнашырға теләгән ир-егеттәр арыуыҡ ҡына йыйылған.  Наил Таһиров, Илдар Мѳхәмәтдинов, Тимур Ильясов, Николай Калугин, Сергей Иванов, Юрий Березин, Владимир Лецкий, Антон Валавин, Кирилл Кучкин, Илья Петров, Раф Габбасов, Олег Красавин был клубҡа буш ваҡыттары булған һайын йыйыла. 
Ярышҡа үҙ көсөн һынап ҡарарға килгән ҡатнашыусылар махсус теркәү үткәндән һуң, ярыш  судьяһы һәм үҙе лә ошо ярышта ҡатнашыусы Сергей Иванов барыһын да  уйын барышының ҡағиҙәләре менән таныштырҙы. Йәрәбә ярҙамында дәғүәселәр һайланғас, һәр кем үҙ уйын өҫтәленә юлланды.  
Бильярдсы Николай Калугин:
Был турнир икенсе  тапҡыр үтә. Быйыл уйында ҡатнашыусылар күберәк.  Улар араһында был спорт тѳрѳ менән күптәнән мауыҡҡандар ҙа бар. Шәхсән үҙем бильярд менән  ун йылдан ашыу шѳғѳлләнәм. Владимир Лецкий, Олег Красавин бильярд менән күптәнән дуҫ. Ҡала, республика ярыштарында ҡатнашып, призлы урындар алабыҙ. Республика турнирында ла ҡатнашабыҙ. Белорет спортсылары бильярд буйынса мәртәбәле урындарҙы яулай, беҙҙе беләләр һәм ихтирам итәләр. Икенсе тапҡыр ойошторолған турнирҙа барыһына ла уңыштар, дәрт теләйем. 
Бильярд клубы директоры Ноэль Таһиров:
Беҙҙең коллективҡа ѳс йыл тулды. Ошо арала күптәр бильяд уйнарға ѳйрәнде. Уйынсылар араһынан  Владимир Лецкийҙы билдәләп үтер инем. Ул бик тырыш егет, тиҙ арала уйнарға ѳйрәнеп, хәҙер  лидерҙар араһына сыҡты. Шулай уҡ Тимур Ильясов та беҙҙең клубҡа  5 ай ғына йѳрѳүенә ҡарамаҫтан, яҡшы һѳҙѳмтәләр күрһәтә. Бильярд клубы етәксеһе булараҡ, клубтың тарихы тураһында ла бер-нисә һүҙ әйтеп үтмәксемен. 
- Ѳс  йыл элек ҡалала бильярд клубы астыҡ. Тәүҙәрәк уйнарға, ѳйрәнергә генә йѳрѳнѳләр, һуңынан, егеттәр күбәйеп киткәс, үҙҙәре лә аҡса йыйып, ике бильярд ѳҫтәле һатып алдыҡ. Ҡалала был уйын тѳрѳ менән мауығыусыларҙың күп булыуы һѳйѳндѳрә. Улар араһында 15-20 кеше бик әүҙем. Бильярдсылар республика ярыштарында ла ҡатнаша, еңеүҙәр яулай. Был беҙҙең клуб ѳсѳн яҡшы һѳҙѳмтә. Клубта кѳслѳ команда тупланған.  Бѳгѳнгѳ уйындың дәртле һәм уңышлы үтеүен теләйем. Турнирҙа ҡатнашыусыларға үҙемдең исемдән дә бүләк әҙерләнем, ти Ноэль Миннивәли улы, спортсыларға яҡшы кәйеф теләп.
Турнир ошо спорт тѳрѳн ысын күңелдән яратҡандарҙы йыйған. Дәрт, уйында яҡшы һѳҙѳмтә күрһәтеү, еңеү теләге ярышыусыларға бер минутҡа ла уяулыҡты юғалтырға ирек бирмәне, ярыш был спорт төрөндә көслөнө асыҡланы.  Бер нисә сәғәт буйына дуҫтарса күңелле мѳхиттә сәмле уйын барҙы, дәрт, илһам, беренсе ѳс урын ѳсѳн алыш егеттәргә кѳс ѳҫтәне. Турнирҙа ҡатнашыусыларҙың береһе лә һынатманы, уларҙың барыһы ла яҡшы кәйеф һәм дәрт алды. Ярыш һѳҙѳмтәләре буйынса еңеүселәр түбәндәгесә билдәләнде.
Кирилл Кучкин турнир еңеүсеһе тип танылды. Ул лайыҡлы I урынды яуланы. Николай  Калугин турнир еңеүсеһенә һис тә бирешергә теләмәне һәм II урынға сыҡты. III урынға Сергей Иванов лайыҡ булды.