Төбәктәге ташҡынға бәйле хәл тикшерелде

Улар төбәктәге ташҡынға бәйле хәлде һәм республиканың янғын йәһәтәенән хәүефле миҙгелгә әҙерлеген тикшерҙе.

Марат Латипов һүҙҙәренсә, Башҡортостанда тотороҡло хәл һаҡлана. Ағиҙел, Дим һәм Оло Ыҡ йылғаларында 16 апрелгә һыуҙың аҙ күтәрелеүе билдәләнә. Белорет районының Ар Ташы ауылы янында Ағиҙел йылғаһының кимәле тәүлек эсендә 9 сантиметрға артҡан. Шишмә районының Бочкарев ауылы эргәһендә Дим йылғаһының һыу кимәлебер тәүлектә 24 сантиметрға күтәрелгән. Эҫем, Инйәр һәм Әй тау йылғаларында һыу кимәле максималь кимәлгә еткән. Ә бәләкәй дала йылғаларында уның кимәле кәмей. Йомағужа һәм Павловка һыуһаҡлағыстары — тултырыу режимында, ә Нөгөш һыуһаҡлағысы һыу ташлау режимында эшләй. Павловка һыуһаҡлағысының эш графигына ярашлы, Ағиҙел һәм Ҡариҙел йылғаларында максималь кимәл 21-23 апрелгә фаразлана.

Башҡортостан буйынса Ғәҙәттән тыш хәлдәр министрлығы контролендә 16 муниципалитет, унда 102 йорт яны биләмәһе, 343 баҡса участкаһы, 21 автомобиль юлы участкаһы һәм һигеҙ күпер һыу аҫтында ҡалған. Шул уҡ ваҡытта торлаҡ һәм баҡса йорттарын һыу баҫмаған.

Марат Латипов республика биләмәһендә янғын хәүефһеҙлеге буйынса өҫтәмә саралар күрергә тәҡдим итте. Хәтерегеҙгә төшөрәбеҙ, Башҡортостан хөкүмәте ҡарары менән янғын хәүефе янаған 187 тораҡ пункт, 62 баҡса ширҡәте һәм 45 балалар һауыҡтырыу лагеры билдәләнгән.

«Башинформ» хәбәр иткәнсә, республикала аномаль йылы һауа торошо көтөлә, шуға бәйле Марат Латипов 27 апрелдән Башҡортостанда янғынға ҡаршы махсус режим индерергә тәҡдим итте.

«Эҫе осорҙа янғын сығыу хәүефе арта, урмандарҙа ут таралыу хәүефе барлыҡҡа килә. Шуға күрә янғынға ҡаршы режим усаҡ яғыуҙы, сүп -сар яндырыуҙы тыйыуҙы, шулай уҡ халҡыбыҙҙың именлеген тәьмин иткән башҡа сараларҙы тормошҡа ашырыуҙы  күҙ уңында тота», - тине Марат Латипов.

Осрашыуҙа шулай уҡ төбәктең янғынға ҡаршы хеҙмәттәренең матди базаһын нығытыу мөмкинлектәре ҡаралды.

Ҡабул ителгән саралар республикала янғынға ҡаршы хәлде тотороҡло һаҡларға мөмкинлек бирә. Мәҫәлән, һуңғы биш йылда республика биләмәһендә янғындар һаны — һигеҙ, ә утта һәләк булғандар һаны 13 процентҡа кәмегән.