"Бөркөт" тәүге һынауын үтте

Алдан хәбәр итеүебеҙсә, Данис Йыһаншин махсус хәрби операциялағы яугирҙар өсөн пилотһыҙ осоу аппараты етештереү өсөн аҡса йыйыуҙы иғлан иткәйне. Район-ҡала, республика, башҡа өлкә халҡы ярҙамы менән, ҡыҫҡа ваҡыт эсендә, бер млн. һум аҡса йыйылды. Был аҡсаға бөтәһе 34 аппарат етештерергә мөмкин.

Аҡса йыйылғандан һуң эшҡыуар етештереүҙе ойоштороу, кәрәкле деталдәр һатып алыу буйынса эш башланы, ә инде сентябрҙә “ҡош”то йыя башланылар. Бер нисә көн эсендә беренсе ул әҙер ине. Белореттар уға “Бөркөт” тигән исем ҡушты.

Кисә, 9 сентябрҙә, тәүге “Бөркөт” һынау үтте. Һынау уңышлы үткән, хәҙер инде ошо юл менән башҡа “ҡош”тар ҙа етештерелә башлаясаҡ.

– Бөгөн аҡса йыйыуҙа, кәңәштәре менән ярҙам иткән Белорет районы һәм ҡалаһы халҡы, белемдәре, ҡулдары менән ярҙам иткән егеттәр менән бергә эшләгән проектты – ҡошсоғобоҙ “Бөркөт”тө һауаға осорабыҙ. Бөркөт – беҙҙең Белорет районы гербында. Был осоусы аппарат алғы һыҙыҡта булған егеттәребеҙгә хәрби бурыстарҙы уңышлы үтәһендәр, иҫән-һау булһындар өсөн ышаныс һәм ярҙам, – тип белдерҙе Данис Йыһаншин.

“Бөркөт”тө һынаған көндө ҡыҫҡа ялға ҡайтҡан пилотһыҙ осоусы аппараттар взводы командиры Белоретҡа килеп, эш барышын күҙәткән һәм кәңәштәр биргән.

Алға барған ауырлыҡтарҙы еңә, тиҙәр. Илһөйәр яҡташыбыҙ Данис Йыһаншиндың был эште алып барып сығарасағына яҡташтары һис икеләнмәй һәм тәүге һөҙөмтә бар. Әммә эш бының менән туҡтамаясаҡ, “Бөркөт” пилотһыҙ осоусы аппараты ай һайын етештереү ҡаралған. Бының өсөн аҡса йыйыу дауам итә. Һеҙ ҙә “Бөркөт”тәр күберәк осһон, дошманды ҡыйратһын өсөн өлөш индерә алаһығыҙ: Сбербанк картаһы: 4279060015596729. Тәғәйенләнеше: “Поддерживаю своих”.

Иҫегеҙгә төшөрәбеҙ: Данис Йыһаншин мутлашыусыларҙан һаҡ булырға саҡыра! Дошман йоҡламай, ялған шылтыратыуҙар ҙа булған, һорауҙар булһа, тура үҙенә сығығыҙ.

Фото: скриншот.