Еңел атлетика кросын үткәрҙе

Иң етеҙ исеменә комбинаттың төрлө цехтары һәм подразделениеларынан 80-дән ашыу спортсы, шулай уҡ Белорет педагогия колледжы һәм Башҡорт иҡтисад-юридик колледжы студенттарының йыйылма командаһы көрәште. Ҡатнашыусылар дүрт йәш төркөмөнә бүленеп,  ир-егеттәр 1000 метрға, ҡатын-ҡыҙҙар 500 метрға йүгерҙе.

“Металлург” стадионының йүгереү юлына тәүгеләрҙән булып ҡунаҡтар - колледж студенттары сыҡты. Кристина Ғәниева һәм Данил Красавин яҡшы һөҙөмтәләр күрһәтте.

Артабан комбинаттың спортсылары старт һыҙығына баҫты. 29 йәшкә тиклемге йәш төркөмөндә иң етеҙе тип продукция тейәү бүлегенең йөк һәм багаж ҡабул итеүсеһе Ксения Лысенкова табылды,  39 йәшкә тиклемге категорияла сым һуҙыу цехының эш бүлеүсеһе Екатерина Дмитриева еңде. 49 йәшкә тиклемге төркөмдә I урынды метрология бүлеге инженеры Юлия Клейменова яуланы. Өлкән йәш төркөмөндә былтырғы лидерлыҡты техник үҫеш департаментының баш белгесе Наталья Астахова һаҡлап ҡалды.

Артабан стартҡа еңел атлет-металлургтар сыҡты. 29 йәшкә тиклемге йәш категорияһында сым һуҙыусы  Игорь Кудряшов лидер булды. 39 йәшкә тиклемге спортсылар араһында ҡорамалдарҙы эксплуатациялауҙы күҙәтеү бүлегенең баш инженеры Игорь Платонов еңеү яуланы. 49 йәшкә тиклемге йәш төркөмөндә электр ҡорамалдарын техник хеҙмәтләндереү цехының ҡорамалдарҙы ремонтлау буйынса мастеры Николай Поляковҡа тиңдәр булманы. 50 йәш һәм унан өлкәндәр категорияһында 4-се ҡорос сым цехының төп производство участкалары бригадиры Юрий Лихачев еңеү яуланы.

Ярыштар йомғаҡтары буйынса команда зачетында цехтарҙың беренсе төркөмөндә (хеҙмәткәрҙәр һаны 200 кешенән күберәк булған подразделениелар) завод идаралығы командаһы спортсылары еңеү яулаһа,  икенсе төркөмдә (хеҙмәткәрҙәр һаны 200 кешенән кәмерәк булған подразделениелар) беренсе урынды әҙер продукцияны тейәү бүлеге командаһы яулай.

Ярыштарҙа еңеүселәр һәм ҡунаҡтар грамоталар һәм бүләк сертификаттары менән бүләкләнде.