Проекттар тикшерелде

Минскиҙағы осрашыуҙан һуң бер йылдан кәмерәк ваҡыт үтһә лә, ошо ваҡыт эсендә байтаҡ эштәр башҡарылды, тип билдәләне республика етәксеһе. Иртәгә ашлыҡты урып-йыйып алғандан һуң, эшкәртеү өсөн ҡорамалдар етештереү заводы төҙөлөшөнә старт бирелә.

Беларусь менән Башҡортостан араһында хеҙмәттәшлекте үҫтереү мәсьәләләре буйынса эшсе төркөм әүҙем эшләй. 2022-2024 йылдарға саралар планы менән нығытылған килешеүҙәрҙе тормошҡа ашырыу буйынса системалы эш төҙөлгән. Планға быйыл март айында ҡул ҡуйылған, әммә барлыҡ сараларҙың дүрттән бер өлөшө үтәлгән.

Сауҙа-иҡтисади хеҙмәттәшлектә яҡшы динамика күҙәтелә, тине Радий Хәбиров. Быйыл тауар әйләнеше уҙған йыл кимәлендә көтөлә. Былтыр ул яҡынса 300 миллион доллар тәшкил иткәйне. Башҡортостан Башлығы Беларусь президенты Александр Лукашенконың тауар әйләнешен байтаҡҡа арттырыу бурысын ҡуйыуын хәтергә төшөрҙө.

«Сәнәғәттә, ауыл хужалығында практик кооперацияға айырыуса иғтибар бүләбеҙ. Беҙҙә Минск трактор заводы, «Гомсельмаш», «Запагро-маш» компаниялары, Гомель заводы менән берлектәге эш буйынса яҡшы миҫалдар бар», — тине Радий Хәбиров.

Башҡортостан республикабыҙ биләмәһендә йыйылған яңы агротехника һатып алыуға сығымдарҙы субсидиялау буйынса дәүләт ярҙамын һаҡлап ҡалды, тип билдәләне республика етәксеһе. Ә был тәү сиратта белорус техникаһы.

Шулай уҡ Башҡортостанда шасси һәм махсус техника производствоһын урынлаштырыу буйынса «МАЗ» менән берлектәге проектты бойомға ашырыуға ҡыҙыҡһыныу арта.

Радий Хәбиров һүҙҙәренсә, Башҡортостанда алдағы йылдарға төҙөлөш, коммуналь һәм юл техникаһына ихтыяж ҙур. Быйыл «Амкодор» менән генә 48 берәмек техника алыу өсөн килешеү төҙөлгән.

«Төбәк-ара хеҙмәттәшлек әүҙем үҫешә. Октябрҙә Өфөлә Гомель өлкәһенең башҡарма комитеты рәйесе Иван Иванович Крупко һәм Гомель бизнесы вәкилдәре етәкселегендәге делегацияны ҡабул итәбеҙ. Өлкә менән хөкүмәт-ара килешеүгә ҡул ҡуйырға әҙерләнәбеҙ. Беларусь Республикаһында юлдарҙа аварияларға һәм үлем осраҡтарына хәлдең һиҙелерлек яҡшырыуын беләм, беҙ 10 йыл элек үк башланған «Изге юл» программаһын тормошҡа ашырыу тәжрибәһен өйрәнергә әҙербеҙ. Саҡырыуыбыҙҙы ҡабул иткәнегеҙ һәм берлектәге проекттарҙы хуплағанығыҙ өсөн тағы ла бер тапҡыр рәхмәт», — тине Радий Хәбиров.