Бөгөн өлөшләтә мобилизация тамамланды

Республикабыҙҙан мобилизацияланған ир-егеттәр уҡыу частары урынлашҡан биш ҡалаға ‒ Пензаға, Һарытауға, Ҡазанға, Еланға һәм Вольскиға оҙатылды.

Кисә тура бәйләнеш ваҡытында Радий Хәбиров төбәктә запастағы яугирҙәрҙе оҙатыуҙың ойошҡанлы үтеүен әйтте.

«Бурысты үтәнек. Махсус хәрби операция зонаһына юлланған ир-егеттәргә ихтирам һәм рәхмәт һүҙҙәрен әйткем килә. Үҙем уларҙы оҙатыуҙа ҡатнаштым, ғаиләләре менән үҙҙәрен лайыҡлы тотоп, ләкин моңһоу ғына ҡарап хушлаштылар. Улар туристик сәйәхәткә түгел, ә ғүмер һәм һаулыҡ өсөн хәүефле урындарға бара. Хәҙерге көндә төп бурыс, коллегаларым да мине ишетә, уларҙың ғаиләләре хаҡында хәстәрлек күреү. Бар көсөбөҙҙө һалырбыҙ», ‒ тине республика етәксеһе.