"Йыл кешеһе" конкурсы еңеүселәре билдәләнде

 "Йыл кешеһе" конкурсы еңеүселәре "Мечел”дың мәңгелек двигателе", "Идеялар генераторы", "Асыҡлыҡ һәм камиллыҡ өсөн" кеүек өс номинацияла билдәләнде.

"Мечел”дың мәңгелек двигателе" номинацияһында комбинат етәкселегенең бер тауыштан ҡабул ителгән ҡарары менән предприятиеның Хеҙмәт даны музейы һаҡлаусыһы, предприятиеның ветерандар советы рәйесе, 58 йыллыҡ эш стажы булған металлург, әүҙем гражданлыҡ һәм тормош позицияһы алып барған Сергей Болонин еңеүсе тип билдәләнде.

Башҡа ике номинацияла иң яҡшыларҙы билдәләү бер нисә этапта үтте. Тәүгеһендә һәр подразделениенан кандидаттар исемлеге төҙөлә, шунан һуң махсус комиссия һәр категориянан өсәр дәғүә итеүсене билдәләй. Йомғаҡ яһағанда эш тәжрибәһе, хеҙмәткәрҙең производство эшмәкәрлегенә индергән өлөшө һәм предприятиеның йәмәғәт тормошонда әүҙемлеге иҫәпкә алына. Бынан һуң Белорет металлургия комбинатының "Бәйләнештә" социаль селтәрендә  асыҡ тауыш биреү уҙғарыла. Теләгән һәр кем һайланған дәғүәсе өсөн тауыш бирә ала.

"Идеялар генераторы" номинацияһында 1-се ҡорос сым-канат цехы начальнигы урынбаҫары Александр Юрочкин еңеү яуланы. Ул комбинатта 20 йылдан ашыу эшләй, һөнәри юлын 16-сы цехында сым һуҙыусы булып башлай. Александр Сергеевич һаҡсыл етештереү өлкәһендә ысын идеялар генераторы, ҙур практик тәжрибәгә эйә һәм хатта иң ҡатмарлы бурысты ла үтәй ала.

"Асыҡлыҡ һәм камиллыҡ өсөн" номинацияһында 4-се ҡорос сым цехының участка начальнигы Иван Реутский лидер булды. Иван Олегович хеҙмәт эшмәкәрлеген 2011 йылда 4-се сорт прокат цехында термотравиль агрегаттарында иретеүсе булып башлай, һуңыраҡ өлкән мастеры була, цехтың тотош производствоһы уның тотороҡло эшенә бәйле. Иван Олеговичтың белеме, оҫталығы һәм ҡуйылған бурысты дөрөҫ еткерә белеүе арҡаһында участка коллективы производство бурыстарын яҡшы үтәй.

- Бындай форматтағы конкурста беренсе тапҡыр ҡатнаштым һәм, әлбиттә, ике аҙна тулҡынланыуҙар менән үтте, айырыуса тауыш биреүҙең һуңғы сәғәттәре. Бының өсөн миңә туғандарымдың, дуҫтарымдың, коллегаларымдың ҙур ярҙамы тейҙе, улар миңә уңыштар теләне, әүҙем тауыш бирҙе һәм һайлау барышын күҙәтте. Өҫтәүенә, Үрге Әүжән халҡы ла минең өсөн тауыш бирҙе.  Бындай ярҙам  ҡиммәт тора! Конкурста еңеү -  яңы ҡаҙаныштарға, алға һәм билдәләнгән бөтә маҡсаттарға өлгәшеү өсөн реаль стимул! - тип билдәләне комбинаттың 1-се ҡорос сым-канат цехы начальнигы урынбаҫары Александр Юрочкин.

“Ярҙам иткәндәрҙең барыһына ла ҙур рәхмәт! Бындай юғары баһа - тырышлығыбыҙҙың бушҡа булмауын, эшебеҙҙең һәм тәҡдим иткән һәм индергән идеяларыбыҙҙың предприятиены үҫтереүгә булышлыҡ итеүен күрһәтә”, - тип өҫтәне “БМК” компанияһының 4-се ҡорос сым цехының участка начальнигы Иван Реутский.