“Сал ҡылған моңдары” конкурсы еңеүселәре билдәләнде

Конкурстың тәүге этабына Башҡортостандың 11 муниципаль берәмегенән ҡатнашыуға 64 ғариза ҡабул ителгән. Икенсе һайлап алыу этабы йомғаҡтары буйынса финалға Әбйәлил, Бәләбәй, Белорет, Кушнаренко, Өфө, Хәйбулла райондарынан, Бәләбәй һәм Өфө ҡалаларынан 11 ҡатнашыусы үтте.

Конкурсҡа ярашлы ҡатнашыусылар икешәр - халыҡ һәм эстрада йырын башҡарҙы. Сәхнәнән башҡорт, татар һәм рус телдәрендә төрлө быуындарҙың популяр һәм яратҡан йырҙары яңғыраны. Белорет районы исеменән ике ҡатнашыусы - Ҡаһарман ауыл мәҙәниәт йортоноң “Әхирәттәр” халыҡ фольклор ансамбленең алыштырғыһыҙ ҡатнашыусыһы Вәлимә Ҡарасурина, шулай уҡ Абҙаҡтан Мөнирә Ишмырҙина сығыш яһаны.

Конкурсанттарҙы билдәле мәҙәниәт эшмәкәрҙәре һәм йырҙарҙы талантлы башҡарыусылар - Башҡортостандың халыҡ артисы Резида Әминева; Халыҡ-ара, Бөтә Рәсәй һәм Республика конкурстары лауреаты, опера йырсыһы Әлиә Исҡужина; Республика һәм Халыҡ-ара конкурстар лауреаты, билдәле башҡорт эстрадаһы йырсыһы Ян Лира баһаланы.

Жюри ҡарары буйынса Мөнирә Ишмырҙина I дәрәжә Диплом менән бүләкләнде, ә Вәлимә Ҡарасурина Гран-при яуланы!

Сығанаҡ:  Белорет мәҙәниәт идаралығы.