Уйын Сермән һәм ҡала хоккейсылары осрашыуы менән башланып китте. Беҙҙең егеттәр еңел генә 6:0 иҫәбе менән оттолар. Ҙур булмаған тәнәфестән һуң "Юность" менән "Байназар" боҙға сыҡты. Белорет командаһы был уйында ныҡышмаллыҡ күрһәтеп, еңеүгә ынтылды. Бер мәл иҫәп 3:4 булып торҙо. Тик белореттар бер нисә уңайлы мәлде ҡулдан ысҡындырҙылар. Ә "Байназар" тағы бер гол индереп, еңеүгә өлгәште.
Ниһайәт, бөтәһе лә түҙемһеҙлек менән көткән уйын - "Бөркөт" - "Байназар" командалары иғлан ителде. Уйын бик матур һәм һоҡланғыс булды. Бигерәк тә Байназар мәктәбе уҡыусылары Динислам һәм Вадимдың бер-береһен һүҙһеҙ генә аңлап, беҙҙең ҡапҡа алдында даими рәүештә көсөргәнеш тыуҙырып тороуҙары маҡтауға лайыҡ. Ҙур тырышлыҡ һалып, "Бөркөт" еңеүгә өлгәште һәм беренсе "Миҙгел кубогын" яуланы. Байназарҙар - II, белореттар III урынды яуланылар. Киләһе осрашыуҙарға тиклем, егеттәр!
Айытбай ӘЙҮПОВ.
Сермән ауылы.