Районда тәүге тапҡыр Ҡоролтайфест уҙҙы

Тән вә йән сәләмәтлеген, дөрөҫ йәшәү рәүешен пропагандалау, башҡорт йәмәғәт ойошмалары араһында дуҫлыҡ, берҙәмлек һәм үҙ-ара хеҙмәттәшлек булдырыу ише маҡсаттарҙы күҙаллаған сарала Белорет, Бөрйән райондары, Межгорье ҡалаһы башҡорттары ҡоролтайҙары, райондың Ирҙәр ҡоро, Инйәр ауыл ҡатын-ҡыҙҙар советы командалары ҡатнашты.      

Яҡын-тирә район-ҡалаларҙың иң дәртле, рухлы, сәмле йәштәре “Хеҙмәткә һәм оборонаға әҙер” Бөтә Рәсәй физкультура-спорт комплексы нормативтары менән танышып, үҙ көстәрен, мөмкинлектәрен һынаны. Биш ҡатын-ҡыҙ һәм биш ир-егеттән торған командалар иҙәнгә ятып, шулай уҡ ҡулға таянып кәүҙәне күтәреү, оҙонлоҡҡа һикереү, гимнастика эскәмйәһенә баҫып алға эйелеү, 16 килограмлыҡ герҙы күтәреү ише спорт төрҙәрендә уҙышты. Уларҙы район-ҡаланың әүҙем йәмәғәт эшмәкәрҙәре - Гөлнар Мөрсәлимова, Гөлнара Зыкрина, Динә Әҙелмырҙина, Наил Хәмзин, Лилиә Сибәғәтова, Дим Йомағужин баһаланы. Ярыштар барышында  командаларҙың етди әҙерлеге, берҙәмлеге һоҡландырҙы.

Һөҙөмтәләр буйынса, Инйәр ауыл ҡатын-ҡыҙҙар советының “Заман йәштәре” командаһы иң яҡшы күрһәткестәргә өлгәшеп, I урын яуланы. Күсмә Кубок тапшырылыуы иһә уларға киләһе сараны үткәреү бурысын йөкмәтте.

II урын менән лайыҡлы рәүештә бөрйәндәр нарыҡланһа, III урынға ҡала-район   башҡорттары ҡоролтайының “Аҡбуҙат” командаһы сыҡты. Бынан тыш, шәхси беренселек буйынса I-III урындар яулаған егет-ҡыҙҙар ҙа Дипломдар һәм иҫтәлекле бүләктәр менән баһаланды.

Ҡоролтайфестың мәртәбәле ҡунаҡтары - муниципаль район хакимиәте башлығы Андрей Иванюта, Бөтә донъя башҡорттары ҡоролтайы Башҡарма комитеты рәйесе, Башҡортостан Республикаһы Дәүләт Йыйылышы - Ҡоролтай депутаты  Юлдаш Йосопов башҡорт йәштәрен тәбрикләп, һәммәһенә лә изге теләктәрен еткерҙеләр.

- Бындай форматтағы сара беҙҙең өсөн яңы тәжрибә. Уны тормошҡа ашырған барлыҡ ойоштороусыларға, ҡатнашыусыларға ҙур рәхмәт белдерәм. Ҡоролтайфест бынан ары ла даими уҙғарылыр, күберәк командалар ҡатнашыр тигән өмөттә ҡалам, - тине үҙ сығышында Юлдаш Мөхәмәт улы.  

Сараны ойошторған һәм уҙғарған Белорет район-ҡала башҡорттары ҡоролтайы рәйесе Эльза Мөхәмәҙиева, әүҙем йәмәғәт эшмәкәре Динә Әҙелмырҙина, Бөтә донъя башҡорттары ҡоролтайының йәштәр йүнәлеше буйынса баш белгесе Ләйсән Рабаданова Башҡортостан Республикаһы Спорт министрлығының Рәхмәт хаттары менән бүләкләнде.