Яҡташтарыбыҙ “Работяги” телешоуында ҡатнаша

 Шоу - экстремаль спорт проекты, унда, авторҙар вәғәҙә иткәнсә, барыһы ла ғәҙел буласаҡ. Телеканал хәбәр итеүенсә, унда билдәле шәхестәр түгел, ә ауыр хеҙмәтте яратҡан ябай эшселәр ҡатнаша.

Бөтә Рәсәйҙән йыйылған 40 кеше араһында крансы, иретеп йәбештереүсе, янғын һүндереүсе, слесарь, тегенсе, ҡотҡарыусы, технолог, поезд машинисы кеүек ир-егеттәр һәм ҡатын-ҡыҙҙар бар. Уларҙы көс, сыҙамлыҡ, тиҙлек һәм ҡыйыулыҡҡа һынауҙар көтә. Экстремаль марафон ун аҙна дауам итәсәк. Шоуҙы алып барыусы - спортсы Роман Костомаров, ул күптәр өсөн сыҙамлыҡ һәм көс өлгөһө булып тора, сөнки аяҡ һәм ҡулдарын ампутациялағандан һуң данлыҡлы фигуристтың аяҡҡа баҫып, әүҙем йәшәү рәүешен алып бара алыуы билдәле.

Ҡатнашыусылар иҫәбендә Башҡортостан вәкилдәре - Белореттан 35 йәшлек контейнер ташыусы судно капитаны ярҙамсыһы Рәмил Ямғуров һәм Межгорьенан 30 йәшлек слесарь Дмитрий Локтионов бар.

Рәмил ҡаланың 8-се, 21-се мәктәптәрендә уҡып, Өфө йылға училищеһын тамамлай. Һуңынан Санкт-Петербургта юғары уҡыу йорттарының береһендә уҡый. Рәмил - ун йылдан ашыу стажы булған тәжрибәле моряк. Уның эше уға күп илдәрҙә булырға мөмкинлек бирә. Ул техника менән, бензобысҡынан алып кранға тиклем, оҫта идара итә. Үҙен ныҡлыҡҡа һынауҙы ярата. Уның мауығыуҙары араһында: марафондар, ҡышҡы һыу инеү һәм сноубординг. Шулай уҡ альпинизм менән мауыға. Яҡташыбыҙ Эльбрусты яулаған.

Дмитрий Межгорьела тыуған, хәҙер Силәбе өлкәһенең Троицк ҡалаһында йәшәй. Слесарь булып эшләй, фитнес-тренерлыҡ эшен дә алып бара. Буш ваҡытында көс экстримы менән шөғөлләнә, донъя рекорды ла ҡуйған. 410 тонна ауырлығындағы туғыҙ вагондан торған составты 10 метрға тиклем шылдыра.

Ир-егеттәр һынауҙарҙы уңышлы үтеп, “Халыҡ чемпионы” Кубогын һәм төп бүләкте аламы? Тапшырыуҙы 2 декабрҙә “Пятница!” телеканалында ҡарарға мөмкин. Ул киске сәғәт 7-лә башлана (12+).