Юғары һөҙөмтәләргә табан

Һуңғы йылдарҙа муниципалитетта бокс ышаныслы үҫеш ала. Урындағы спорт мәктәптәре, тренерҙар коллективы һәм спортсыларҙың башланғысы ярҙамында был спорт төрө үҫмерҙәр һәм йәштәр өсөн тағы ла уңайлыраҡ була бара. Спорт еңеүҙәре нигеҙендә райондағы олимпия резервы спорт мәктәбенең емешле эше ята.

Ҡаланың 3-сө мәктәбендә урынлашҡан бокс залында йәш спортсылар, тәжрибәле остаздар етәкселегендә, бокс техникаһын һәм тактикаһын үҙләштереүҙән тыш, ихтыяр көсөн, дисциплина һәм еңеүгә ынтылыш та тәрбиәләй.

18 йыл дауамында райондың олимпия резервы спорт мәктәбенә ҡараған бокс секцияһы уңышлы эшләп килә. Бөгөн бында 100-ләгән ҡыҙ һәм малай бокс менән шөғөлләнә. Тәжрибәле тренерҙар Джагфар Джиганчин, Аркадий Сухов һәм Эдуард Йәғәфәров тәрбиәләнеүселәрен бәләкәйҙән ныҡлы, сыҙам, көслө итеп тәрбиәләй. Хәйер, был спорт төрө менән шөғөлләнгәндә башҡаса булыу мөмкин дә түгел. Йәш спортсыларҙың төрлө ярыштаҙа ҡатнашыуы ихтыяр һәм физик көстө арттырыуға ныҡлы ерлек булып тора. Уларҙың ҡул аҫтында шөғөлләнеүселәр юғары ҡаҙаныштарға ирешеп, район данын республика, округ һәм ил күләмендә яҡлап, үҙҙәрен көслө спортсы итеп танытты ла инде.

- Һәр спорт төрө кеүек үк Белоретта бокс та үҫешә. Көн дә күнекмәләр үтәбеҙ, үҙебеҙ өсөн яңылыҡтар алабыҙ, башҡа тренерҙар менән аралашабыҙ, ярыштарҙа ҡатнашабыҙ. Шуныһы ҡыуаныслы, бокс төрөн үҙ итеүселәр йылдан-йыл арта ғына бара. Күпселеге 2016-2017 йылғы балалар килә. Улар 12 йәштән ныҡлап бокс менән шөғөлләнә башлаһалар ҙа, тәжрибәлерәктәренең рингта алышҡанын күҙәтергә ярата. Спортсы үҫешһен өсөн, мотлаҡ практикаһы булырға, рингка сығырға тейеш. Әгәр ҙә ул тиҫтерҙәре менән алышҡа йыш сыға икән, алға китеш тә буласаҡ. Бокс менән шөғөлләнгән бала һәр яҡлап үҫеш ала. Ул сыҙамлыҡ, етеҙлек, көс, хеҙмәт һөйөүсәнлек һәм, әлбиттә, дисциплина тәрбиәләй. Иң мөһиме, намыҫлы булырға, дөрөҫ ҡарарҙар ҡабул итергә, үҙ-үҙеңде, көсһөҙөрәктәрҙе яҡларға өйрәтә. Хәҙер бокс спортын үҫтереү өсөн саралар бүленә. Шуныһы ҡыуаныслы. Яңыраҡ Баймаҡта бокс буйынса Башҡортостан чемпионатында ҡатнаштыҡ. Турнир ҙа юғары кимәлдә үтте, бүләктәр ҙә шәп булды. Йәш спортсыларға бигерәк тә WBA һәм IBF версиялары буйынса донъя чемпионы Денис Лебедев менән осрашыу оҡшағандыр. Ярыштарҙан һуң икенсе көнөнә күнекмәләргә килде. Был нимә тураһында һөйләйҙер бит. Үҙем дә бокс спортына йәштән килдем. Остазым - юғары категорияға эйә булған Дмитрий Островский. Урта белем, флотта хеҙмәт итеү, һуңынан педагогия колледжы... Әлеге көндә тренерлыҡ эшен алып барам. Остазымдан да ярайһы уҡ тренерлыҡ тәжрибәһе тупланым, тип әйтә алам. Бокс секцияһы эшләү дәүерендә күп кенә спорт мастерлығына кандидаттар, спорт мастерҙары, төрлө чемпионат еңеүселәре әҙерләне. Бокс секцияһы спортсылары төрлө күләмле ярыштарҙа ҡатнашып, чемпиондар булды. Тәрбиәләнеүсебеҙ - Рәсәйҙең спорт мастеры Бекхан Исраилов һәүәҫкәр һәм профессионал бокста ла сығыш яһай. Шулай уҡ Рәсәйҙең спорт мастеры Хаджи Мамайосоповты ла билдәләп үтергә мөмкин. Спортсылар икеһе лә Рәсәй чемпионаты еңеүселәре. Белорет спорт залының бына ошондай форвардтары ла бар. Уларҙан өлгө алып өмөтлө спортсылар үҫә. Шуныһы үҙенсәлекле, был спорт төрөн үҙ иткән ҡыҙҙар ҙа шөғөлләнә спорт залында. Мәҫәлән, ачери-биатлонда спорт мастерлығына кандидат дәрәжәһенә тиклем үҫкән, был спорт төрөндә ярайһы уҡ еңеүҙәр яулаған Кристина Ғәниеваның бокс залында шөғөлләнеүенә 3 йыл. Физик яҡтан ярайһы уҡ тәжрибә туплаған спортсы Башҡортостан күләмендәге ярыштарҙа призлы урындар яулай, Волга буйы федераль округы буйынса үткән ярышта III урын алды. Злата Петроваға өмөттәр бағлайбыҙ. Үҫмерҙәр араһында улар күптәр. Залда 7-8 спорт мастерлығына кандидат шөғөлләнә. Уларҙың иҫәбе, әлбиттә, алышынып тора. Сөнки мәктәпте тамамлағас, икенсе ҡалаларға уҡырға китәләр. Ҡайһы берҙәре боксты ташламай, шөғөлләнеүен дауам итә һәм Белорет мәктәбен дә онотмай. Совет мәктәбе буйынса спортсылар тәрбиәләйбеҙ, һөҙөмтәле ул. Күптәрҙең кумиры булған Дмитрий Бивол да совет мәктәбе спортсыһы. Йәштәр Артур Бетербиев, Руслан Колесников, Павел Сосулин, Денис Лебедев кеүек билдәле спортсыларға оҡшарға, тиңләшергә, өлгө алырға тырыша. Беҙҙең төп бурыс – лайыҡлы шәхес үҫтереү. Ҡалғаны үҙҙәренән тора,

тине бокс секцияһы тренеры Аркадий Сухов.

26 сентябрҙә Өфөлә Халыҡ-ара бокс ассоциацияһы президенты Умар Кремлев һәм Рәсәй Бокс федерацияһы ярҙамында ойошторолған “IBA.PRO 9” турниры үтәсәк. Был спорт сараһында башҡорт боксы йондоҙҙары Артур Собханкулов, Азалия Әминева һәм Данис Ғабдрафиҡов айырым иғтибар үҙәгендә буласаҡ.

Аркадий Сергеевич белдереүенсә, райондың йәш спортсылары ла әлеге ҙур ваҡиғаға шаһит булыу бәхетенә эйә буласаҡ. Ошо кимәлдәге алыштарҙы күреү, чемпиондарҙың тактикаһын анализлау һәм уларҙың хаталарын иҫәпкә алыу - йәш спортсыларға баһалап бөткөһөҙ тәжрибә. Бигерәк тә, башҡорт спорты йондоҙо Азалия Әминева менән бер рингта алышырға теләгән Кристина Ғәниева өсөн. Белорет педагогия колледжы студенты, ике спорт төрөндә спорт мастерлығына кандидат Кристина артабан да яҙмышын спорт менән бәйләргә уйлай. Спортсы Краснодар, Ҡазан, Ырымбур һәм Өфө спортсылары менән рингка сығыр инем, ти. Көслө дәғүәселәр ти ул.